Mingəçevirdə Xocalı soyqırımı ilə bağlı anım tədbiri keçirilib

0 190

Fevralın 26-da Mingəçevir Şəhər İcra Hakimiyyəti və YAP Şəhər Təşkilatının birgə təşkilatçılığı ilə Xocalı soyqırımına həsr olunmuş video-konfrans keçirilib.

Konfransdan öncə şəhər İcra Hakimiyyətinin başçısı İlham İsmayılov,  YAP şəhər təşkilatının sədri Cavanşir Yusubov, hüquq mühafizə orqanları, partiya fəalları və xocalı nümayəndələri karantin rejiminin tələblərinə əməl etməklə Şəhidlər xiyabanındakı Soyqırım abidəsi önünə gül dəstələri qoyublar.

Sonra Şəhər İcra Hakimiyyətində tədbir öz işini davam etdirib. Konfransı giriş sözü ilə şəhər İcra Hakimiyyətinin başçısı İlham İsmayılov açıb. O, qeyd edib ki, xalqımızın qan yaddaşına ən ağır faciə kimi yazılan Xocalı soyqırımından artıq 29 il keçir: “Mən xalqımıza bu faciəyə görə başsağlığı verirəm və Xocalıda şəhid olmuş insanların, habelə bütün şəhidlərimizin xatirəsini bir dəqiqəlik sükutla yad etməyi təklif edirəm. Allah rəhmət eləsin.

Məlum olduğu kimi, Xocalı faciəsinə ilk dəfə Ulu öndər Heydər Əliyev tərəfindən 1994-cü ildə siyasi qiymət verilib və dünya ictimaiyyətinin Xocalı soyqırımı ilə bağlı məlumatlandırılması istiqamətində xeyli iş görülüb. Heydər Əliyev Xocalı faciəsinin Beynəlxalq təşkilatlar tərəfindən soyqırım kimi tanınması üçün əməli tədbirlər həyata keçirilib. Ümummilli Lider müdrikcəsinə demişdir: «Xocalı faciəsi iki yüz ildən çox müddətdə erməni millətçilərinin xalqımıza qarşı apardığı soyqırımı siyasətinin qanlı səhifəsidir. Bizə aydındır ki, ölkəmizin ağır günlərində ulu öndər Heydər Əliyev respublika rəhbərliyində olsa idi, nəinki Xocalı faciəsinin, eləcə də bundan əvvəl baş vermiş 20 Yanvar faciəsinin, torpaqlarımızın iyirmi faizinin itirilməsi, xalqımızın başına zaman-zaman gətirilmiş digər faciələrin də qarşısı alınmış olardı.

Milli Məclis tərəfindən verilmiş qərarla 26 fevral “Xocalı soyqırımı və milli matəm günü” kimi elan edilib. Bu gün Azərbaycan Respublikasının Prezidenti cənab İlham Əliyev Xocalılara və bütün məcburi köçkünlərə diqqət və qayğı göstərir. Xocalıdan olan bacı və qardaşlarımızdan 93 ailənin 365 nəfəri köçkünlük həyatını Mingəçevir şəhərində keçirir. Biz çalışırıq ki, imkan dairəsində onları hər cür qayğı və diqqətlə əhatə edək.”

Tədbirdə Mingəçevir Dövlət Universiteti tarix müəllimi Tahirə Quliyeva, YAP Şəhər Təşkilatının sədri Cavanşir Yusubov, Gənclər evindən Aytac Abdullayeva, “Qarabağ Müharibəsi əlilləri, Veteranları, Şəhid ailələri İB şəhər şöbəsinin sədri Nizami Təhməzov çıxış edərək Xocalı faciəsi ilə bağlı fikirlərini bölüşüblər.

Şəhər İcra Hakimiyyətinin başçısı İlham İsmayılov tədbirin işinə yekun vuraraq bildirib ki, Xocalı faciəsinin ildönümü ilə əlaqədar bütün dünyada tədbirlər təşkil edilir, Xocalı qurbanlarının xatirəsi anılır: “Mitinqlər, piketlər keçirilir, ermənilərin vəhşilikləri barədə məlumatlar dünya ölkələrinə çatdırılır. Heydər Əliyev Fondunun rəhbərliyi ilə ayrı-ayrı ölkələrdə Xocalı faciəsi ilə bağlı tədbirlər həyata keçirilir. Artıq dünyanın bir çox ölkələrində Xocalı soyqırımının tanınması barədə qətnamələr qəbul edilib.

Heydər Əliyev fondunun vitse-prezidenti Leyla Əliyevanın təşəbbüsü ilə “Xocalıya ədalət” kompaniyası dünyanın 50-dən çox ölkəsində uğurla həyata keçirilir.

Azərbaycan Respublikasının Prezidenti cənab İlham Əliyevin rəhbərliyi altında ötən il 30 ilə yaxın bir müddətdə işğal altında olan torpaqlarımız Şanlı ordumuzun qalibiyyəti ilə azad olundu, sərhədlərimiz bərpa edildi. 2020-ci il Azərbaycan tarixinə zəfər ili kimi daxil oldu. 44 gün davam edən müharibədə Füzuli, Cəbrayıl, Zəngilan, Qubadlı, Şuşa, Ağdam, Kəlbəcər, Laçın rayonları, Xocavənd və Xocalı rayonlarının bir hissəsi azad olundu. Xocalı, Xankəndi şəhərləri, Xocavənd və Ağdərə rayonlarının bir hissəsi hazırda sülhməramlı qüvvələrin nəzarətindədir. Orada vaxtilə yaşayan soydaşlarımızın həmin ərazilərə qaytarılması üçün işlər gedir. Əminəm ki, ölkə Prezidenti cənab İlham Əliyevin apardığı diplomatik danışıqlar nəticəsində soydaşlarımız öz doğma yurdlarına qayıdacaqlar. Bu günlər uzaqda deyil”.

Tədbirin sonunda şəhər icra hakimiyyəti tərəfindən Xocalı şəhid ailələrinə ərzaq bağlamaları da verilib.

Esmira Hidayətova

Your email address will not be published.