Mingəçevir teatrı aktrisanın vəfatı ilə bağlı nekroloq yayımladı

Mingəçevir Dövlət Dram teatrının rəhbərliyi aktrisanın vəfatı ilə bağlı Nekroloq yayımlayıb.

Azbelediyye.az həmin nekroloqu təqdim edir:

Mingəçevir Dövlət Dram Teatrının tanınmış aktrisası İbrahimova Elmira 2022-ci il dekabrın 20-də, ömrünün 66-ci ilində dünyasını dəyişib.

Qeyd edək ki, İbrahimova  Elmira  Məhəmmədəli qızı 1957-ci il oktyabrın 3-də Yevlax rayonunun Tanrıqulular kəndində anadan olub.  1975-ci ildə Yevlax rayonunun Tanrıqulular kənd orta məktəbini bitirib. 2003-cü ildən etibarən Mingəçevir Dövlət Dram Teatrında aktrisa vəzifəsində işləməyə başlayıb.

Teatrın səhnəsində ilk obrazı Novruz bayramı şənlikləri üçün hazırlanan tamaşada  “Küpəgirən qarı”  obrazı olub.  Səhnədə o, respublikanın  xalq artisti Ella Yaqubova, mərhum əməkdar artist Nisə Rzayeva, həmçinin İsa Alimov, İldırım Cabbar, Zülfi Məmmədov, Afət Əliyeva ilə uğurlu çıxışlara imza atıb.

Sonrakı illərdə “Eşq və intiqam” da Xalisə, “Məhv olmuş gündəliklər” də Ana, “Ağıllı dovşan” da Bayquş, “Məkrli məhəbbət” də Nazirin qızı, “Min bir gecə” də Hərəm ağası, “Müfəttiş” də Anna Andreyevna, “Bir eşqin nəticəsi” də Maral xanım, “Sərgüzəşti – vəziri – xani – Lənkəran” da Ziba xanım, “Nənələr ərə gedir” də Sərvinaz, “Subaylarınızdan görəsiniz” də Səlimə və digər obrazları aktrisanın maraqla baxılan obrazlarındandır.

Elmira İbrahimovanın aktrisa yaradıcılığı, səhnədə canlandırdığı, təbiiliyi və inandırıcılığı ilə səciyyələnən rəngarəng xarakterli obrazları onu geniş tamaşaçı auditoriyasına sevdirmişdir.

İstedadlı aktrisa, qayğıkeş və səmimi insan Elmira Məhəmmədəli qızı İbrahimovanın xatirəsi onu tanıyanların qəlbində həmişə yaşayacaqdır. Bir daha mərhumun doğmalarına, əzizlərinə, dostlarına, həmkarlarına dərin hüznlə başsağlığı verir, kədərlərini, acılarını bölüşürük.

Allah rəhmət eləsin!

Kanal32.az